【Now財經台】葉氏化工集團(00408)昨日(17日)收市後公布回購計劃，指會用內部資源用回購最多3000萬元股份，刺激股價今日(18日)造好，高開4%後，其後升幅一度擴大至近15%，高見1.7元，升穿250天線後，升幅收窄。
集團指出，現價無法反映內在價值及業務前景，希望透過回購計劃，提升每股資產淨值或每股盈利。
值得留意係，葉氏化工今次擬用庫存持有方式做回購，唔係傳統回購後註銷嘅做法，呢個回購方式可以唔註銷，集團日後可以在市場再出售。不過，上市規則都有唔少限制，例如一般喺回購後30日內，唔可以在場內外售股、出售庫存股份後30日內唔可以做回購等。
葉氏化工股價今日喺今年低位徘徊，今年曾低見1.32元，跌至2021年初以來低位，投資者要留意用新例回購係咪會成為回購新方向。
