【Now財經台】亞盛醫藥(06855)一口氣公布咗3單利好消息，股價應聲爆上，今朝(17日)高開約15%後，短短5分鐘內，衝高29%至29.8元，升上近年半高位。
首先，亞盛同日本武田藥品達成戰略性合作，獲武田入股7.7%，籌集到嘅資金大部分用嚟開發核心產品，包括「耐立克」，現時已被納入國家醫保藥品目錄，以及獲美國食品藥品管理局(FDA)資格認定。
雖然亞盛燒錢速度及財政壓力好大，但武田獲得「耐立克」海外許可權後，亞盛會收到最高多約12億美元行使費，加埋武田入股帶嚟嘅逾5億元，即合共有逾90億元潛在收入，更重要係藥品有出海機會，呢個係另一個利好消息。
最後1個利好消息係亞盛擬以美國預託證券(ADR)形式上市，已向美國證交會(SEC)交咗F1文件，踏出上市第一步。
不過，生物科技股係美國制裁主戰場，亞盛係咪可以順利上市，同埋「耐立克」出海後風險係咪會增加都係潛在隱憂，若以高位計，亞盛股價3日已累升約50%，14天相對強弱指數(RSI)已升至77嘅超買水平，睇嚟要喺30元關口前先行整固。
