【Now財經台】法國議會選舉提前至月底舉行後，當地在野黨同現屆政府大打「口水戰」，政局再添不明朗引發法國股市大崩盤，上周累計蒸發逾2100億美元市值及今年以來嘅升幅。
早前，左翼聯盟「人民陣線」表示，反對總統馬克龍(Emmanuel Macron)嘅經濟改革及歐盟財政立場。有政府官員警告，一旦左派上台將導致法國「脫歐」，更有爆發金融危機風險。
星展銀行(香港)豐盛私人客戶執行董事鄧威信表示，留意到唔少資金由法國股市流向國債等避險資產，加上7月初輪到英國大選，料歐洲市場短線會持續波動。
不過，Wilson指出，參考返英國脫歐(Brexit)嘅過程，事件爆發初期英鎊、英股亦要大跌，但當市場評估到相關風險，並消化完消息後，資金自然會慢慢回流。
