【now.com財經】噚日揀咗隻恒指牛(56768)出嚟，用咗大約一個小時左右平均執3格或8%。不過，噚日指數喺下晝2點10分至15分出咗個「平底」喺五分鐘圖之後，指數就慢慢一直向上行至收市咁滯，以收市口價計，仲爬返上噚日朝早嘅開市價，空心陽燭得以保住。而如果(56768)咁痴線可以守到收市前走貨嘅話，咁應該唔止8%/tea time食個蛋撻咁簡單。
唔緊要，市幾乎日日都開，遲啲打風黑雨喺屋企都有得玩，只要正數Keep到就可以啦。
噚日見指數收市後，於五分鐘圖上Slow STC(14.3)兩線於超買位上出觸頂，都已經喺作戰室裡面講定恒指第二日裂口低開的話，Slow STC(14.3)就好好似海迪咁推輪椅少女克拉娜落山咁，推低指數。
今朝恒指開市見指數低開84點，開市報18,028點。及至開市後指數跌幅擴大至跌185點，低見17929點，Slow STC(14.3)亦見往超賣方向出發。還好作戰室喺完U至未正式開市期間拉定線，淡倉Standby，同步知道唔係一開市就個個都追得切，所以慢慢哋加埋安全注比戰友揀；而今日嘅安全注就係剛好喺低位17,929點見「平底」後，棄淡轉好做一個反手。
依家10點6分，天文台將黃雨upgrade到紅雨，而戰友嘅安全注好倉亦都順利完成。
10點打後再睇下個小時圖，見指數已經重新上返去小時圖中軸線之上。講咗N次作戰室唔係單純比出入位同冧把嘅地方，解釋咗比其中一位戰友一啲拉線畫圖技巧之後，轉個下指數已經重新向下反，連小時圖嘅Slow STC(14.3)都耷返個頭落去。
如果要追指數向下再落，最大嘅一個「原因」就係往重牛方向出發。所以恒指熊(60855)，收回價18450點，同現價有約372點，槓桿約38.5倍，街貨未到20%就算啦，五分鐘圖見保歷加開始趨向下行，睇下今日指數借唔借保歷加底線&最近嘅平均線玩swing向下走。
作者阿珊，以技術分析專心玩輪證，唔貪心，努力賺取我家肥貓罐罐。
Patreon作戰室七日免費體驗：https://www.patreon.com/join/cbbcwar
