【Now財經台】蘋果公司(Apple Inc.)備受外界關注嘅人工智能(AI)技術Apple Intelligence,終於喺日前舉行嘅全球開發者大會(WWDC)壓軸登場,但股價到昨晚(11日)先有反應,收市大升逾7%兼破頂,市值單日進帳2150億美元,創單日最大增幅,市值升至3.18萬億美元,進一步超越英偉達(Nvidia),係咪反映市場對Apple嘅AI前景有好大憧憬?
潤淼資產管理董事盧志威指,Apple今次趁WWDC提升返集團硬件以外嘅產品吸引力,因為之前推出嘅產品,銷售一直谷唔起,加上憧憬加咗AI元素嘅iPhone 16將會引爆換機潮,吸引唔少投資者再追入Apple。
William又話,Apple後市主要視乎兩大因素,首先係加咗AI功能嘅iPhone 16好大機會掀起換機潮,其次係資金流走向,由於Nvidia拆細後股價一定會調整,部分較保守嘅投資者會換馬至Apple,佢估計,Apple股價短期將會繼續升。