【now.com財經】噚日喺【輪證下半Part】揀咗隻恒指牛(57252)出嚟，本來都只係諗住睇下有無計用時間換格仔，換換下換咗餐飯返嚟。
以噚日出文時間1點19分，如常的用10分鐘作為睇文時間的話，則於1點29分再睇返指數，喺五分鐘圖上見指數稍為低10/20線以下水平，再比多五分鐘時間，指數慢慢爬返上去兼重新守返極低斜度嘅「上升通道」，喺呢個時侯比隻(57252)出去，如常的用10分鐘作為買貨時間的話，期內(57252)高低位做過0.044元/0.038元，平均買入價為0.041元。
落場後剛好坐得到保歷加通道口拓闊嘅快車，指數忽然向上高衝，過咗噚日朝做嘅高位之後仲愈上愈有，終於喺18267點，企過100線後停落嚟，爭一點「平頂」出現後指數向下回落，喺2點35分見指數重新向下兼失守10線後，(57252)亦都可以選擇起身離場。
按期內(57252)高低位做過0.055元/0.051元計，平均走貨價為0.053元，呢一趟持貨約1小時平均袋10格或24.39%，同作戰室嘅戰友都好少喺下午出到貨仲要飽到打嗝。
不過，今日返嚟見指數再向下跌143點開市，開報18,032點，同噚日嘅低位17,994點只係38點，同時今日見牛熊證街貨圖，第一層17,900至17,999點有700幾張期指街貨，都未算勁，因為由17,800至17,899點開始向下數過去連續三層，每層都有過千張期指街貨喺度。
今日Chatroom嘅server好似出咗啲事，send唔到/send得慢，但唔緊要，因為一早比定晒位，拉同晒線，大家只係靠自己睇多少少圖就可以；反正就應該自己學識睇圖啦。所以依家10點左右，已經見到唔少戰友今朝Plan定第一注淡倉開出，隨住指數向下殺咗第一層牛證街貨之後，大家都率先正數落袋先。
等到10點打後個server好似正常返，而小時圖上亦見保歷加通道仍然拓闊中，指數目前擺位雖然有似出低位「身懷六甲」，但係依家只係10點12分，所有嘢都仲未定形，而進取嘅戰友亦都火速開第二Round淡倉，準備向住重貨區出發。
恒指熊(60846)，收回價18,425點，同現價有約483點距離，已經係市場上最貼價嘅熊證，槓桿雖然唔係最高(有約30.9倍)，但都係要避開啲高街貨所以pick佢。
出貨前望一望五分鐘圖條Slow STC(14.3)同保歷加通道走勢，喺超賣位嘅話就唔好搞住啦，除非保歷加通道口拓闊啦。
作者阿珊，以技術分析專心玩輪證，唔貪心，努力賺取我家肥貓罐罐。
Patreon作戰室七日免費體驗：https://www.patreon.com/join/cbbcwar
