【Now財經台】手袋代工商華新手袋國際控股(02683)發盈喜，股價今朝(11日)低開5%，開市報0.43元，但已經係暫時高位，其後跌幅一度擴大至逾14%，低見0.39元。
華新手袋預期，截至3月底止，全年收入增長33%，純利最多大增2.75倍，主要受惠於最大市場北美疫後持續復甦，又提及毛利和毛利率都有得升。
如果睇返中期業績，其實下半年表現比上半年差好多，集團中期賺近2100萬元，按盈喜預告盈利範圍計算，下半年純利最多只有約910萬元，即使以上限計算，都比上半年倒退56%。
華新手袋股價今日大跌，一度下試50天線水平，即0.4元水平，投資者要留意今個月出嘅全年業績，睇下點解下半年表現會急速惡化。
