【now.com財經】咁又完咗三日假期，感覺上都無乜做過啲乜咁(除咗上鑽石山拜拜阿公阿婆之外)，但望望月曆，過多兩個星期左右又有三日連假，七一嘛；同步即今個2024年又過咗一半，時間過得真係快。
對住個電腦幾乎瞓著之際，今朝恒指跌203點，開市報18,163點，當場醒一醒，日線圖見指數重新回落返去5月31日嘅低位附近，依家其實已經9點47分，指數數低見過18,096點，換言之，今日開市無耐已經將牛證首三層街貨全數收回，呢度已經有相當於1,474張期指街貨。
喺五分鐘圖上見指數形態上有似行出低開高走，不過喺第三粒燭出咗「十字星」物體後，今朝第一注淡倉出動咗嘅戰友試試再hold住隻淡倉多一隻，等等「圓頂」生唔生成，生得成再向下博埋佢條頸線。
與此同時，其實都喺小時圖上搵搵到一個好型嘅裂口，就係6月3日嘅開市裂口(18,245至18283點)，不過呢口價呢個位同指數現水平好似有啲遠...
至於下方量度線，由於指數今日低開嘅位置屬呢個星期有多，所以一借就借到拎個日線圖出嚟先至搵到，講緊係用日線圖嘅保歷加通道底線/50線(17,842點/17,840點)，水平相約但要挫到落嚟呢個位，即係要18,000點確認失守先至得。
10點後見指數忽然向下挫逾300點，依家10點6分，指數最低見過18,042點。忽然一浸雨落出，火速走去閂埋隻窗再返嚟之後，見指數已經壓過去18,000點附近，作戰室戰友隻淡倉仍然咬住喺手，怕且都係唔穿18,000唔心息架啦。
小時圖保歷加通道口仍然拓闊，恒指熊(60747)，收回價18,550點，同現價有約380點距離，槓桿有約36.3倍夠做Day Trade，如果今日指數係咁狼死，殺完18000點之後仲要向下殺埋17,800至17,899點呢層第二層嘅過千張期指街貨層的話，咁(60747)去啦；否則，如同平時一樣，用返五分鐘圖做Swing Trade算數囉。
作者阿珊，以技術分析專心玩輪證，唔貪心，努力賺取我家肥貓罐罐。
Patreon作戰室七日免費體驗：https://www.patreon.com/join/cbbcwar
