【Now財經台】美團(03690)首季業績強勁，遠超市場預期，經調整溢利按年增長36%，收入就按年增長25%，值得留意係，新業務美團優選虧損大幅收窄約40%，美團出完業績後，最少獲8家大行上調目標價，反映呢份業績市場都收貨。此外，科網股近期紛紛行可轉換優先票據(CB)「抽水」，但美團表明冇意跟隊發CB，係咪代表已掃除呢個風險？
博威環球證券金融首席分析師聶振邦指，美團去年第4季表現已畀到市場信心，所以股價都有支持，暫時可以先留意125元水平，如果今個月上到130元，後市可以睇得更樂觀，如果想穩陣啲可分兩注買入，現價先買一注，再等股價企穩125元樓上再加注。
聶Sir續指，就算美團發CB，其實股價早已反映呢個因素，集團業績交到貨之餘，又有咁大行撐，消息面上仍然係利好為主。
