【Now財經台】SaaS概念股新紐科技(09600)股價今日(5日)輕微低開後，買盤好快就湧入，股價隨即大幅抽高，最多升18%，高見2.42元，升上逾1年高位，午後股價橫行，收市升16%，報2.37元，近期成交都明顯轉趨活躍，今日成交股數較過去100日同時段平均增3倍。
新紐股價今日抽高，相信同昨晚出嘅通告有關，控股股東兼主席翟曙春計劃12個月內，喺公開市場收購公司最多2%股份，如果買到盡，連同佢個仔，持股量將由逾34%增至逾36%。
值得留意係，新紐上月初以每股0.28元，折讓17%向6名獨立人士配股，集資逾4400萬元，但股價當日離奇飆近2倍，新投資者一入股就有錢賺，配股後翟曙春連同兒子持股量由41%攤薄至34%，但事隔1個月，股價大升後又再增持，時間點上都幾耐人尋味。
新紐股價今日急升，14天RSI已升至78，短線小心有回套風險，要留意大股東增持後有冇後續動作。
