【Now財經台】申洲國際(02313)股價今日(4日)愈升愈有，午後升幅擴大至逾7%，暫時成交金額比過去平均100日多約30%。申洲有唔少大客，包括Uniqlo、Nike、Adidas及Puma，近年新客就有lululemon，集團首季回復增長係咪靠呢班大客？
信達國際研究部董事趙晞文指，去年同期基數低，因為啲廠喺疫後復常唔係好耐，產能利用率需時上返去，申洲主要客戶亦因為要去庫存，導致定單減少。不過，今年係奧運年，巴黎奧運7月26日就會開幕，理論上會提前1季訂貨，帶動申洲產能利用率提早喺上半年回升至90%，甚至100%水平，反映客戶定單已返晒嚟，甚至有回補庫存嘅情況，為今年業績打好基礎。
Hayman續指，因為申洲擴闊運動品牌組合，例如新客lululemon試用期過後，亦會逐步加單，加上國際一線品牌補庫存，所以運動類增速未來有機會加快，將利好申洲收入。
