【Now財經台】玖龍紙業(02689)跟隨大市高開近1%後，好快轉跌，半日最多跌逾6%，低見3.84港元。
集團擬發行4億美元永續債，主要用於現有貸款再融資及一般企業用途，永績債特別之處在於冇到期日，公司可以一路推遲還錢時間或唔贖回債券。
值得留意嘅係，公司高息向管理層發債嘅動機，呢批永續債年息高達14厘，大股東兼董事長張茵及兩位執行董事會認購絕大多數，以每年派2次息計，張茵等人每年可以收息逾4億港元，難免惹人質疑發債係咪真係幫公司解決財政問題。
今次發債規模相當於近29億元人民幣，截至去年底止，玖紙1年內到期嘅貸款約有130億人仔，雖然手持現金得74億人仔，但未動用銀行融資總額有成423億人仔，其實靠備用貸款額已經足夠償債。
玖紙股價今日受壓跌穿4元，技術上處於50周線附近，如果失守埋或要試返之前低位。
