【Now財經台】截至早上11點止，過去1小時內《彭博》用戶搜尋量最多港股，依次為長城汽車(02333)、越秀地產(00123)、美團(03690)、中國海洋石油(00883)及中國石油股份(00857)。
近日汽車股集體升，多家車企亦陸續出咗5月銷售數據，表現都好好，不過，長汽就按年倒退9.5%，加上歐盟擬向中國電動車加徵關稅，長汽亦宣布8月會關閉德國慕尼黑嘅歐洲總部，並裁員約100人，喺冇個好消息下，長汽前景都好難樂觀？
大華繼顯執行董事梁偉源指，長汽算係一眾汽車股之中表現最差嘅股份，佢估計，股價今日(4日)大跌同上月銷售數字唔理想有關。
Steven補充，雖然內地電動車市場競爭好大，不過，長汽電動車銷售按年增長9%，但傳統車就倒退，反映集團面對減價戰嘅同時，本身嘅強項或SUV都做得唔太好。佢又話，歐盟擬加中國電動車關稅，加上競爭大，長汽關閉歐洲總部都係正常，佢亦認同集團下半年經營狀況唔樂觀。
