【Now財經台】五礦資源(01208)同兗礦能源(01171)股價今年分別累升65%及30%，兩隻資源股最新齊齊有「動作」，其中，五礦計劃供股籌錢還債，兗礦就折讓配股集資還債，兩隻股份今早(4日)大跌，係咪可以趁機買貨？兩間公司撲水還債對資源板塊有咩影響？
高富金融集團投資總監梁偉民指，現階段唔適宜吸納資源股，始終股價今年已升咗唔少，加上市場之前憧憬內地經濟復甦，帶動資源價格3月已開始衝高，帶動相關資源股股價向上。
Wyman又提醒，內地經濟暫時未見顯著復甦，加上歐洲經濟疲弱，資源價格短期內急升嘅理據唔充分。佢補充，資源股回套風險增加之餘，依家相繼有呢類公司供股或配股集資，市場難免會擔心呢類股份加快調整。
