【Now財經台】政府收返恒基地產(00012)兩幅農地，集團會獲得逾57億元現金補償，其中，洪水橋被收返350萬呎土地後，恒地喺洪水橋新發展區仲有約300萬呎農地，集團話會繼續發展洪水橋餘下嘅土地儲備，又預期今次收地合共帶嚟基礎稅前盈利約31億元。
博威環球證券金融首席分析師聶振邦指，現時本港經濟不確定性高，獲得呢筆收地補償令恒地財務狀況更穩健，無論呢筆錢點用，都可以優化集團今年嘅財政狀況。
聶Sir又指，今次恒地被收回都係農地，如果自行開發需要較長嘅周期做準備，到時樓市係咪暢旺，銷情係咪理想都有好多變數，政府今次收回逾300萬呎土地，若未來經濟好轉，就可以有地可用，係一個攻守兼備嘅安排，因此，恒地今次被政府收地，整體嚟講都係利好消息。
