【Now財經台】金斯瑞生物科技(01548)股價今朝(3日)大跌，相信同集團可能會被美國調查有關，金斯瑞股價今朝裂口低開15%，短短5分鐘內，跌幅急速擴大至逾25%，低見7.43元，跌至逾6年低位。
美國衆議院1個特設委員會兩名成員，上周四(30日)去信聯邦調查局及國家情報總監辦公室，指金斯瑞同美國企業、政府嘅合作引發知識產權嘅憂慮，亦有可能有助提升內地生物技術，市場即擔心會惹來當局調查，甚至制裁，拖累股價急挫，股份沽壓亦好大，成交股數較過去100日同時段平均大增13倍。
金斯瑞今日喺大成交下急挫，但股價跌到8元水平有少少支持，14天RSI最新已跌至19，後市要留意事件嘅後續發展，對金斯瑞造成幾大實際影響。
