【Now財經台】第四範式(06682)上市僅8個月，股價大部分時間仍然要「潛水」，不過，截至3月底止首季，收入及毛利潤都增長逾20%，雖然公司指出，旗下嘅「先知AI平台5.0」增長顯著，但喺內地人工智能(AI)服務「內捲」(即行業出現過度競爭，導致陷入相互摩擦及出現內部衝突)之下，集團又有幾大優勢及競爭力？此外，第四範式有冇貨源歸邊問題？
艾德金融執行董事陳政深表示，雖然第四範式客戶唔多，只有約124個，但用戶黏性較高，因為用得AI基本上都係大企業，而一旦開始用呢啲模型，就好難轉供應商。Ryan續指，雖然第四範式喺內地面對一定競爭，但唔擔心會出現鬥平問題，因為有效嘅解決方案先至係AI嘅重要因素。
陳政深續指，第四範式係H股，有50%股份喺北水手上，餘下嘅股份唔算太散，喺市值角度睇唔算係壞事，炒上去都易啲，加上公司手頭現金達19億元，未來有併購憧憬，股價隨時有機會爆上。
