【Now財經台】由中國聯塑(02128)分拆，昨日(28日)首掛嘅電商供應鏈解決方案供應商EDA集團控股(02505)，主要客戶係內地企業對消費者(B2C)出口電商賣家，並提供一條龍服務，集團去年業績增速好快，純利倍升之外，收入亦大增70%，依家喺內地市場市佔率僅0.5%，不過，公司仍處於增長期，加上有國際網絡，係咪仲有好大擴展空間？
元宇證券基金投資總監林嘉麒指，EDA增長空間好大，因為市場有好多都係企業對企業(B2B)，海外做B2C一條龍服務真係唔多，呢個係EDA最大優勢。
KK又話，EDA又可以利用母公司聯塑嘅配套，因為聯塑喺海外市場有好多唔同嘅物業，例如有自家物流倉，不論內地嘅物流倉，甚至較少人關注嘅物流國家都接觸到，所以喺運輸方面亦有優勢。佢又話，聯塑有其他合作伙伴，現有配套加上規模優勢，市場競爭又唔大，所以EDA應該有好大擴展空間。
