【Now財經台】領展房產基金(00823)中午出咗全年業績,收益及物業收入都有增長,分別按年升11%及9.5%,不過,由於基金單位數目增加,令每基金單位分派少咗4.3%,但仍好過預期跌5%至7%,單計末期分派就按年升逾11%。不過,整體物業組合嘅商戶每平方呎銷售額,按年僅微升0.4%,其中,超市及食品更按年跌5.1%。
南華金融集團副總裁莫灝楠認為,成個行業未來幾年都要捱逆風,不過,領展係相對穩陣,因為領展旗下商場行民生路線,唔會有太多奢侈品牌進駐,大部分係快餐店、超市、精品店及賣衫等店舖,港人北上消費嘅趨勢,可能會產生少少影響,但對市區嚟講唔會構成新嘅競爭,所以領展業績未必會出現倒退,反而會錄得輕微增長。
不過,佢認為,港人消費水平喺未來幾年已基本見頂,人工成本貴,加上經濟環境唔好,消費者態度仍然較保守,唔會有太多額外消費,所以零售業前景仍然不明朗。