【股市脈搏】同道獵聘突爆上趁機「收割」？

【Now財經台】同道獵聘(06100)係內地招聘線上平台，主攻中高端招聘市場，股價今朝(29日)逆市衝高，一度高見3.41元，勁升逾24%，其後升幅顯著收窄。

內地招聘行業有唔少隱憂，並持續影響集團業務，包括內地金融、內房及科技持續不景氣，內地青年人失業率高企等。

同道獵聘上周出咗首季業績，雖然連續兩季蝕錢，但收入跌幅已顯著收窄至單位數，集團股價今朝一度升穿10天、20天及50天線，但始終受制於去年初內地疫後重啟引伸出嚟嘅下降軌道。