【Now財經台】網易(09999)季績好過預期，但摩根士丹利仍然唱淡，預期網易股價未來60日有70%至80%機會下跌，估計網易第2季業績差過預期，主要受宏觀環境因素，以及其他遊戲推出時間表唔清晰拖累，網易股價喺業績前偷步跌，結果收入及淨利超預期，而手遊收入按年增長19%，可抵銷電腦遊戲收入疲弱嘅影響，而《蛋仔派對》及《第五人格》等遊戲持續受歡迎，《全明星街球派對》及《巔峰極速》喺港澳台推出後，隨即登上暢銷榜前列位置，新遊戲《世界之外》更喺內地一推出就成為No.1，大摩係咪對網易今季業績過慮？
紅蟻資本投資總監李澤銘指，網易嘅手遊收入維持雙位數增長，但電腦遊戲收入就錄得雙位數跌幅，因為去年第1季仍有暴雪娛樂(Blizzard Entertainment)代理嘅遊戲收入，第2季因為雙方「分手」冇咗呢部分收入，但代理遊戲實際毛利率唔高，所以冇咗暴雪嘅收入後，平均毛利率反而明顯改善。
不過，Alan又話，網易第2季增長或出現斷層，始終經典遊戲會老化，而新遊戲亦未見出現爆發性增長，要到第3季或暑假先推新遊戲，令市場擔心第2季業績或令人失望，不過，網易第1季業績都好過預期，所以第2季未必好似大摩估計咁差。
