【Now財經台】AI晶片股王英偉達(Nvidia)交靚季績之餘，更宣布股份1拆10，將於6月7日收市後生效，拆細後入場門檻低咗，可以吸引更多散戶捧場，其實集團2021年5月曾宣布拆細，其後股價飆升，今次會唔會由拆細觸發新一輪升浪？
利達LW基金首席投資及ESG策略師黃耀宗指，市場已估計Nvidia會拆細，所以呢個消息對股價嘅刺激作用唔會太大，估計業績會為股價帶嚟最少逾8%升幅，若升幅大過8.5%，就可能係拆細效應帶動。
佢又話，參考過往其他大型股拆細例子，大部分都會為公司帶來正面影響，而拆細唔代表股價短線會見頂，中線仍然係利好因素，始終流動性增加對集團係好事，估計Nvidia今次拆細嘅影響會係正面。
