【Now財經台】美國聯儲局昨晚公布議息會議紀錄，一如預期偏鷹，唔少官員仍對通脹感到憂慮，值得留意係，有唔少官員質疑聯儲局嘅貨幣政策緊縮程度，係咪足以令通脹降溫，若通脹持續膠著，聯儲局掉頭加息嘅機會大唔大？
資深銀行家王仕雄指，要視乎美國整個經濟大環境，因為有《降低通脹法案》及《美國創新與競爭法》兩個因素，政府要大灑金錢撐新一代創科業務，導致近年美國嘅消費支出強勁，但呢個唔係長久之計，始終美國唔可以再繼續派錢，否則，會推高通脹，加上房地產及能源等關稅對消費者造成好大衝擊。
David又認為，若消費趨勢開始向下，美國就冇條件加息，最令人擔心係美國會出現滯脹，如果利率持續高企，經濟更難錄得增長，尤其今年係美國大選年，加息會不利政治環境。
