【Now財經台】網易(09999)會喺今日(23日)收市後放榜，股價已連跌3日，市場似乎唔睇好呢份季績，股價今日一度挫逾8%，低見141.1元。據《彭博》綜合市場預測中位數，估計網易上季遊戲收入按年及按季都有增長，但由於騰訊控股(00700)及金山軟件(03888)前車可鑑，令市場對網易業績有一定戒心，加上公司延遲推出遊戲《燕雲十六聲》，似乎都要對業績打定輸數。
耀才證券研究部總監植耀輝指，市場的確對網易業績有幾大戒心，騰訊及網易都係內地遊戲龍頭，但兩者收入開始出現落差，近年騰訊增長較理想，反而網易之前大熱遊戲《夢幻西遊》熱潮減退，新遊戲反應又唔理想，遊戲發展面對重重挑戰，所以不宜對網易業績睇得樂觀。
Stanley又話，早前網易與暴雪娛樂(Blizzard Entertainment)「復合」消息一出，網易股價曾彈上160元水平，但睇返公司基本面，遊戲業務表現仍一般，加上延遲推出《燕雲十六聲》，以及競爭激烈下要加大補貼，除非今日出爐呢份業績有驚喜，否則，網易股價暫時好難扭轉劣勢。
