【Now財經台】截至早上11時止，1小時內《彭博》用戶關注度上升最多港股，依次為長實集團(01113)、快手(01024)、金輝控股(09993)、信和置業(00083)、萬科企業(02202)。
美國聯儲局會議紀錄一如預期偏鷹，有官員更質疑貨幣政策是否足夠緊縮，而大行亦唱淡本地地產股，高盛指，即使本港已經完全取消銷售限制，但長期高息環境仍會限制買賣活動，令整體樓價下跌，預料拖累發展商物業利潤率跌至30%以下，因此調低多隻本地地產股目標價，「Higher for longer」論調未改，會議紀錄甚至重燃美國可能調頭加息嘅講法，本地地產股年至今普遍跌5%至20%以上都有，大幅跑輸大市，利淡因素係唔係已經反映？
椽盛資本投資總監曾永堅指，睇返地產股現價，近期嘅反彈普遍已反映咗「撤辣」嘅正面因素，市場正憧憬美國減息帶動本港樓市，不過，即使美國今年下半年減息兩次，本港都未必會跟，可能要等美國減咗兩次息，港銀先有機會跟減，不過，若美國通脹仍然膠著，利息將持續高企，加上本港新盤供應仍多，預期有較大財務壓力嘅發展商，或會減價促銷套現，繼而觸發樓價向下，將會對地產股每股資產淨值(NAV)有影響，即使財力較好嘅地產股，短期亦難擺脫反覆回落壓力。
