【now.com財經】噚晚隨時半個地球嘅人類都睇住隻Nvidia(NVDA)嘅業績，今朝瞓醒睇報道話純利激增逾6倍，勝預期，所以盤後股價推升咗6%有多。
對住隻「股王」，最直接就梗係買Nvidia嘅正股啦，但前題你係必須要有一個可以買到美股嘅A/C；不過，作為港燦嘅話，市場上都真係有以Nvidia作為Underlying嘅輪比你揀，但呢啲冷門都出咗隨時有半年至一年啦，都真係未必有人知嘅嘢，過下手癮可以嘅。So far市場上只得兩隻Nvidia Call，最貼價都講緊同現價有57.26%價外距離嘅(10197)，有成交嘅，槓桿都有5.28倍嘅，有咩事打去發行商啦，佢哋唔係有責任同你收貨，只係有責任維持流通量啫。(真係唔駛搵我架，求下你哋呀(´ー`))
依家9點15分啫，同戰友一齊等緊完U，見隻騰訊(00700)跌緊2.45%/10蚊，學戰友話齌：「恒指10SMA應該都凍過水」，所以都率先Mark定5月10日嗰上升裂口頂18,657點。
都係架，以噚日收市價計，指數已經踩住牛證第一層街貨19,100至19,199點，今日返嚟睇呢層有過張期指街貨，雖然唔係重貨區，不過都夠食啦；重貨區見18,900至18,999點，如果指數痴起線上嚟一下殺到落去18,657點的話，五層牛證街貨夾埋有3,213張期指。嘩~今日先23號，下個星期四(30日)先期結，提早成個星期收工。
完U後見恒指開出嚟報19,024點，跌171點，開呢口價一啲都唔出奇，1,016張期指全數死亡，同時指數亦只係爭24點就事19,000點，向下再望個街貨圖的話，恐怕今日18,900至18,999點呢層都玩完。
指數開市後有見向下再落多幾十點，穿一穿個19,000點，順便食埋19,000至19,099點嗰292張期指街貨，如是者開市1分鐘都唔駛就吞咗總共1,308張期指街貨。
喺作戰室一早用小時圖拉好晒線等指數向下，當然啦，有咩事都梗係走先啦，係咁先啦，下次再玩啦！
恒指熊(58805)，收回價19,377點，同依家9點40分嘅18950點比有約427點，已經係市場上最貼價嗰批熊證啦，槓桿有約33.4倍。
依家見係9點42分咋，稿都差唔多打完但指數亦都差不多到18,900點，作戰室開始食餬啦！大家加油啦！
作者阿珊，以技術分析專心玩輪證，唔貪心，努力賺取我家肥貓罐罐。
Patreon新增內容《開市前速報》，七日免費試用：https://www.patreon.com/join/cbbcwar
