【Now財經台】從事多晶硅生產及光伏項目承包業務嘅新特能源(01799)，股價今早(22日)高開唔夠1%，早市走勢平穩，但午後大幅抽升，最終以接近全日高位收市，報10.24元，勁升17%，一口氣升穿10天、20天、50天及100天線，衝上1個月高位。
內媒今午報道，中國光伏行業協會近日召開高質量發展行業座談會，提及要鼓勵行業兼併重組，暢通市場機制，並要打擊低於成本價格銷售嘅惡性競爭，充分發揮政府有形之手作用，消息一出，刺激整個板塊向上。
新特能源曾於2021年計劃回A，但一直未獲中證監「開綠燈」，導致計劃至今仍未有時間表，新特能源股價今日大幅炒上，但以過去1年計，仍要跌40%，係咪出現真正突破仍要睇多幾日。
