【Now財經台】偉易達集團(00303)股價今日(22日)高開近3%後，升幅不斷擴大，更衝上逾兩年高位，成交股數較過去100日同時段平均大增9倍。
集團昨日(21日)收市後出業績，全年多賺近12%，收入跌4%，毛利率進一步升至29.6%，主要受惠於銷售及分銷成本下降，以及運費和存貨撥備減少。
偉易達股價今日衝高，可能同派息有關，集團派末期息48美仙，全年派65美仙，按年升10%，派息比率高達98%，扭轉過去兩個財年削減派息嘅趨勢。
不過，偉易達市盈率(PE)約10倍，以工業股來講屬於幾高，加上股價已升咗唔少，股息率回落至約9厘，相對強弱指數(RSI)亦已升至80以上嘅極超買水平，今日一升，已升穿保利加通道頂部，睇返技術指標，短線可能會回套，而股份將於7月26除淨。
