【Now財經台】截至早上11時止，1小時內《彭博》用戶搜尋量最多港股，依次為同程旅行(00780)、聯想集團(00992)、華潤啤酒(00291)、國泰航空(00293)及碧桂園服務(06098)。
上榜嘅聯想股價今日(22日)抽升逾10%，係表現最強勢藍籌，集團跟高通(Qualcomm)及微軟(Microsoft)合作推出新一代人工智能(AI)電腦，兩款產品Yoga Slim 7x及ThinkPad T14s第6代，都配備微軟Coplilot+功能，將於6月上市，呢個消息係咪為市場帶來驚喜？聯想明日(23日)會出業績，市場預期，首季盈利按年有得升，但按季會倒退，股價升勢係咪可以持續？
資深證券分析師彭偉新指，AI可以推動聯想桌上及手提電腦銷情，繼而利好業績，雖然早前傳出美國政府部門停用聯想電腦產品，但似乎影響唔大，消息亦已消化晒。目前，相關公司陸續為手機及平板電腦加入AI功能，無疑為聯想帶嚟新機遇。
股價方面，Castor指出，雖然聯想上升動力大，但今日有升過龍之嫌，喺成交配合下，已升穿去年12月底嘅頂部，但唔排除觸發部分投資者喺破位時先行食糊，建議等股價略為回調再追入。
