【now.com財經】中國每年春運，人多到不得了，大家千祈唔好以為在春運出門的人是去旅遊，其實，他們大多數是回家過節，因為不少農村，三、四線城市的人已經搬到一、二線城市生活，趁有假期一齊返老家過年，所以，有不少農村，三、四線城市的住宅物業，平日根本處於空置狀態，在那些地方起樓，根本唔會太多人買，所以，有一些住宅屋苑已經起好超過十年，入住的人會發覺愈住愈少人，樓價愈嚟愈平，那些在三、四線城市起樓內房了解到這個情況，寧願爛尾都唔完成工程，因為他們知道，即使完成工程，所收到的樓價遠遠不能夠支付工程費以及政府的土地費用，樓宇建成之後仲要負責日後管理，保養，維修，可能是一個無底深淵，負責起樓的內房不能不當機立斷，寧願爛尾都唔將樓宇建成，做成今日內房困局的主要原因。
有人話，內房應該完成工程，樓宇建成之後慢慢賣一定可以賣得哂，以前或者可以，現在就很難，一、二線城市影響不大，三、四線城市比較困難，因為人 口愈來愈少，基本上已經有不少樓宇空置，慢慢賣都唔會賣得哂，主要是全國人口減少，中國有14億人口，平均壽命78歲，每年有1800萬人逝世，而在2023年出生率只有1100萬，即是每年減少700萬人，一、二線城市有三、四線以及農村人口補充，即使人口減少都唔會太明顯，三、四線城市除了自然損耗之外，仲有不少年青人移居大城市，人口減少速度會很快，樓宇就算起好都冇人住，停止起樓就是最好方法。
據聞中央政府要求地方政府收購那些爛尾樓，我個人認為這是最好解決方法，在收購之後，地方政府一定會將那些爛尾樓拆除，甚至會在原基礎上建一些公共設施，幾年之後，爛尾樓問題，大家可能唔記得，內房受了今次教訓，以後都唔好在三、四線城市起樓，留返一些機會俾當地小型地產商，唔好食到咁盡。
