【Now財經台】截至早上11時止，1小時內《彭博》用戶關注度上升最多港股，依次為中國恒大(03333)、創科實業(00669)、新奧能源(02688)、友邦保險(01299)、騰訊控股(00700)。
內地不斷出招救樓市，但市場仍睇淡需求前景，瑞銀估計，內房今年銷售最多再跌10%，但預期中央會再加大救市力度，內房股喺國務院政策例行吹風會前「偷步炒上」，會後宣布設3000億人仔再貸款，畀地方買待售房，碧桂園(02007)呢類面臨清盤危機嘅內房，係咪可以藉今輪救市「起死回生」？
紅蟻資本投資總監李澤銘指，面臨清盤嘅內房較難受惠於政策，由於政策係針對整體樓市，唔係個別房企，即使要救，都會救金融機構，始終擔心內房債務機會影響銀行等金融機構壞帳，雖然再貸款規模細過市場預期，而內房債務規模最少10萬億人仔，3000億人仔只係杯水車薪，但市場憧憬中央加碼救樓市，屆時房地產市道就有救，受債務危機拖累嘅金融機構亦可以甩難，由於預期中央打救個別房企意欲唔大，所以面臨清盤嘅房企較難出現一線生機。
