【Now財經台】現貨金價今日(20日)破位創紀錄新高，一眾貴金屬股應聲炒上。當中，白銀價格刷新11年以來高位，帶挈市值唔夠10億嘅中國白銀集團(00815)成為板內升幅王。
集團股價裂口高開14%後，最多炒高60%至見0.49元嘅1年高位，收市仍升54%，報0.47元。其實中國白銀並非上游採礦股，主營銀錠同銀飾珠寶買賣但本身基本面麻麻，唔算直接受惠銀價升浪，而今日成交金額已等同集團約15%市值，相信股價炒得起係因為市值細，易跟隨銀價一齊炒上。
技術上，中國白銀今日一枝大陽燭抽升，要上試2022年下跌落來形成嘅長期阻力線，短線留意銀價仲有冇動力再上，然而最新金銀比率已大幅回落至76倍，接近2022年10月低位，銀價上升空間似乎不多了。
