【Now財經台】物流股EDA集團(02505)今日開始(20日)起招股，將於周四(23日)截飛，招股價介乎2.28元至3.06元，每手1000股，入場費約3091元，最多集資2.99億元。EDA背後係坐擁逾百億元市值嘅母公司中國聯塑(02128)，呢隻新股係咪抽得過？
《香港股票財技密碼》作者梁杰文分析指，近年內地電商市道放緩，EDA租用較多海外倉庫係賣點，輕資產之餘可以食到內地鼓勵民企「出海」嘅政策紅利。此外，公司基本面唔錯，過去3年收入錄高雙位數增長，經營現金流維持正數，反映公司冇集資迫切性，估計最終定價水平對小股民較「友好」，股份上市後，股價短期可望穩定發展。
不過，Mike表示，內地電商物流行業畀幾家科網股龍頭壟斷，縱使EDA喺海外倉儲B2C電商物流嘅細分市場排行第6位，但市佔率僅0.5%，質疑集團中長線能否喺激烈競爭下維持穩定增長。
Mike續指，EDA今起招股，聯塑股價即出現異動，早段一度升8%，除咗抽新股，亦可以憧憬聯塑「母憑子貴」，借子公司IPO消息短暫炒上。
