【Now財經台】人民銀行今日(17日)連出多招救樓市，國務院亦宣布准地方政府買樓救市，可酌情以合理價收購商品房用作保障房，但消息公布後，個別內房股冇乜動靜，其中，中國海外發展(00688)股價更一度向下，其後回升，上月中內地不斷傳來鬆綁措施消息，瑞銀亦發報告唱好內房，帶動板塊顯著反彈，加埋今日多個救市好消息，內房股係咪有排升？
紅蟻資本投資總監李澤銘坦言，內房股仲有幾多上升空間較難估計，始終有太多因素左右資金流向，暫時只可以話港股仍有動力，資金流入趨勢仍可持續，有貨嘅投資者不妨繼續揸住先，不過，一旦見到市況「唔對路」，資金唔再持續流入，或者市場唔再有新消息傳出時，可能意味著大市走勢會逆轉，一般而言，當大市向上時，房地產股會跑贏大市，不過，一旦市況逆轉，房地產亦會跌得急過大市，所以必須小心。
