【Now財經台】內地快遞一哥中通快遞(02057)今日(16日)開市前公布季績後，股價愈升愈有，今朝輕微低開後隨即向上企穩，午後最多抽升10%並高見191.4元，收市報188.7元，仍升8%。
內地快遞行業的價格競爭加劇，上季低價快遞比例上升，中通嘅單票價格亦下降2.5%。面對業內持續內捲，集團稱採取咗「不做虧本快件」策略，接受今年市場份額喺一定範圍內回落，因此首季雖然按年少賺逾13%至約14億人仔，但收入增長近11%，毛利率亦升2個百分點至30.1%，明顯高過順豐速運等主要競爭對手嘅6%至13%。
不過，技術上，中通股價今日突破今年以來嘅阻力位後，14天相對強弱指數(RSI)已經升至73嘅超買水平，短期或有回調壓力。
