【Now財經台】新秀麗(01910)昨日(15日)出咗季績，收入僅增長0.9%，毛利率按年升2個百分點，業績後遭大行削目標價，股價今日(16日)一度急瀉14%，低見24.75元，錄得兩年來最大單日跌幅。不過，集團提及7月會派現金股息，又重申會推進第二上市，但未有時間表，加上明日(17日)收市後恒指季檢出爐，多次大熱倒灶嘅新秀麗或有機會「染藍」，睇返現價及以上利好消息，值唔值得部署？
艾德金融執行董事陳政深指，睇返新秀麗財務狀況，毛利率增長似乎冇太大壓力，首季毛利率高達60.4%，若能夠維持呢個水平已經收貨，但值得留意係，毛利率增長動力主要來自亞洲市場，或受惠於短期嘅銷售渠道改善，所以未必可以持續。
Ryan又話，新秀麗市盈率(PE)介乎10至11倍，加上業績唔差，只係冇市場預期咁高，即使未來旅遊需求唔會大幅增長，但大幅下跌機會亦唔大，相信股價喺100天線有支持，預期仍有10%至15%上升空間，所以現價仍值得部署。
