【Now財經台】前身是利寶閣嘅貓屎咖啡控股(01869)擬配股集資，以每股0.144元，配售2.2億股新股，較周二(14日)收市價，折讓19%，集資3183萬元，雖然集團折讓配股，但股價今日(16日)不跌反升，裂口高開逾14%後，一度升近80%，高見0.32元。
貓屎咖啡今次配股集資所得，有60%用嚟發展內地及本港咖啡業務，公司之前一直冇喺本港發展咖啡業務，所以投資者會有一定憧憬，可能是股價今日爆上嘅主因。
值得留意係，雖然配股價折讓19%，但仍比去年8月嘅易主價高約10%，反映投資者願以溢價支持公司轉型，股價今日一度炒到上0.32元，但上影線好長，要小心喺高位現沽壓。
