【Now財經台】美國4月通脹數據連同核心消費物價指數(CPI)齊齊回落，係幾個月來首次符合市場預期。不過，CPI數據出爐前，聯儲局主席鮑威爾(Jerome Powell)話，現時嘅數據唔足以給予局方足夠信心減息，又指最少要觀察多1季。
鴻鵠資產管理行政總裁陸庭龍認為，距離美國總統大選只剩返半年，聯儲局傾向維持市場穩定，事實上，局方去年底已開始「溫水煮蛙式」預告會改變利率政策，鮑威爾咁講只係慣常管理預期嘅做法，以避免資產價格大幅波動。
據最新利率期貨顯示，難得一面倒地估計6月及7月減息機會係零。Alan表示，市場普遍預期9月有機會減息0.25厘，雖然大選前只減息1次同投資市場預期有落差，但美國經濟冇之前咁暢旺，加上歐洲各國明顯有需要比美國更早開始減息，相信市場炒減息預期嘅氣氛仍會持續。
