【Now財經台】據報內地正考慮減免經港股通炒港股嘅投資者股息稅，部分高息中資股今日(10日)表現強勢，股價一度落後嘅水泥股，今日都升得唔錯，其中，金隅集團(02009)升逾6%，中國建材(03323)更大升逾9%，係咪主要受減免股息稅傳聞帶動？
富途證券高級策略師譚智樂指，喺多個資源板塊中，水泥股係最落後，尤其行業同內房關係密切，始終投資市場對內房仍有唔同程度嘅憂慮，例如爛尾項目等導致水泥需求疲弱，雖然唔係產能嚴重過盛嘅行業，但好易受需求面影響。
Arnold又話，資金流入水泥股主要有兩個原因，首先係派息水平較高，又直接受惠於減免股息稅，其次係基於宏觀經濟敏感度，同埋派息比率穩定。此外，內房開始見底，對水泥需求面亦有幫助，佢認為，如果做短線操作係可以考慮水泥股。
