【Now財經台】2019年底疫情爆發時，衍生咗一批受惠於「宅經濟」嘅疫情股，業務及股價一度表現搶鏡，不過，據《金融時報》最新引述美國評級機構標準普爾(S&P Global)數據報道，統計咗50隻疫情受惠股後發現，呢批公司由2020年至今，市值合共蒸發近1.5萬億美元，係咪反映呢類股份價值已大不如情，甚至已毫冇價值？
馬山資本董事總經理林子傑指，疫情為全球經濟帶來結構性改變，以視象會議股Zoom為例，雖然疫後WFH(在家工作)仍有需求，但公司增長高峰已過，亦畀唔到更多憧憬投資者，其次係市場競爭加劇，Zoom喺技術上已經冇領先優勢。不過，林子傑指出，疫情股仍有「倖存」份子，包括網絡安全技術公司CrowdStrike，股價由2019年約34美元，升至現時逾300美元，主要受惠於疫後網絡活動增加，尤其集團業務涉獵到人工智能(AI)，可以食住近年嘅AI熱潮。
