【Now財經台】英倫銀行昨晚(9日)議息後維持利率不變，連續第6次會議按兵不動，符預期，值得留意係，今次多咗委員贊成減息，副行長拉姆斯登(Dave Ramsden)更直言支持依家減息，行長貝利(Andrew Bailey)就話，唔排除下次會議，即係6月。市場就估計，英國8月減息，到底下個月還是8月機會較大？
臻享顧問董事總經理王良享認為，依家英國通脹約3.2%，回落速度都幾快，但經濟增長勢頭唔及歐洲，所以6月減息嘅機會只係一半一半。不過，如果未來兩個月美國通脹回落得較快，英國有機會早過聯儲局喺6月開始減息，若美國9月或12月才減息，英國亦有可能推遲減息。
Tommy又話，當英倫銀行考慮減息之餘，亦要考慮英鎊匯價，近期英鎊喺1.25水平上落，一旦跌至1.2水平，英國率先減息而美國又唔減，通脹有可能掉頭向上，所以英國幾時減息始終要睇住美國。
