【Now財經台】美國上周新申領失業救濟人數係逾8個月以來最多，美元及美債息齊跌，主要係市場對經濟放緩嘅預期升溫，炒減息憧憬，減息預期持續困擾股市，不過，之前一度炒作聯儲局今年可能會加息，因為通脹仍然高企，市場依家係咪減息、加息輪住炒？
博威環球證券金融首席分析師聶振邦指，減息始終係市場焦點，唔止美國，幾時減息喺英國及歐元市場嘅關注度都較高，雖然英倫銀行昨晚(9日)議息後維持利率不變，但行長貝利(Andrew Bailey)話，唔排除6月會減息。另一方面，歐元區消費物價指數(CPI)持續回落，逐漸接近2%嘅通脹目標，所以歐洲央行(ECB)有搶閘減息嘅可能，令美國短期內有機會減息，市場氣氛就炒起嚟。
