【Now財經台】再鼎醫藥(09688)今朝(9日)出咗首季業績，股價今日一升到尾，曾高見16.3元，勁升近24%，收市仍升近21%，報15.9元，成交較過去100日同時段平均增4倍。不過，集團呢份季績唔算特別好，雖然收入按年增長39%，但虧損擴大至5350萬美元。
再鼎寄望今年加快商業化，依家有3項新潛在產品準備上市，其他處於後期研發階段嘅產品進展順利，集團正推進5年戰略規劃中收入顯著增長，以及2025年底實現盈利嘅目標。
再鼎股價近3周自低位累計反彈54%，今日升至100天線水平，集團會喺香港時間今晚8點舉行電話會議，相信商業化進程及實現盈利步伐都會係焦點。
