【Now財經台】中央近期密集式出招谷內地經濟，反映加大力度提振經濟及金融市場表現嘅決心愈來愈大。有分析認為，上月底召開嘅中央政治局會議都承認內地經濟的確面對唔少挑戰，並釋出加大支持經濟增長力度嘅訊號，到底呢啲政策係咪真係對症下藥，可以解決到當前嘅經濟問題？
資深銀行家王浵世認為，內地及香港主要靠房地產市場推動經濟，內房供應太大，導致產生唔少問題，過去一段時不同城市都鬆綁樓市措施，最新杭州宣布全面取消限購政策，買樓就可以落戶，對內地人嚟講係好大吸引力，例如可以由鄉鎮搬去杭州係一個好大誘因，又可以拉動當地經濟。
王浵世續指，市場蓬勃與否要睇資金係咪可以去到市場，如果錢一直擺喺銀行，想發圍都唔容易。佢指出，留意到部分銀行如民生銀行(01988)及招商銀行(03968)已經唔做6個月以上嘅長期大額存款，反映資金會流向市場，喺呢啲變動下，市場可能開始變得活躍，因為擺錢喺銀行回報唔高，就會考慮其他投資工具，最簡單嘅投資就係買樓，佢估計，隨著資金下半年流入市場，相信會對樓市有一定刺激作用。
