【Now財經台】美股「科技7雄」(Magnificent 7)只得英偉達(Nvidia)未出季績，除咗Tesla及Facebook母公司Meta業績令市場驚嚇外，其他都符合，甚至好過預期，係咪可以趁科技股剛調整完開始買貨？
金馬資本管理交易策略師蘇沛豐認為，7雄中交到靚業績嘅公司，股價未來可能會大幅調整，因為部分資金擔心大市有回調風險而減持大型科技股，佢建議投資者等強勢股完成整固後再買貨，例如Nvidia、微軟(Microsoft)及Google母公司Alphabet等人工智能(AI)發展較突出嘅公司。
Daniel續指，唔少資金喺季績期之後轉戰防守性較強嘅板塊，包括傳統電力股、日常消費股及軍工股。佢解釋，隨著AI數據中心運算力大增，對發電量需求自然急速上升，電力股如新紀元能源(NextEra Energy)、南方公司(The Southern Company)亦受惠於AI發展。
至於日常消費股勝在盈利穩定，Daniel較睇好龍頭如高露潔棕欖(Colgate-Palmolive)、可口可樂(Coca Cola)及百事(PepsiCo)。
此外，軍工股就睇好洛歇馬丁(Lockheed Martin)喺地緣政治風險升溫下，可受惠於美國對軍機嘅需求上升。
