【Now財經台】煤炭相關股持續強勢，主力生產採煤機嘅三一國際(00631)股價今日(7日)平開後，早段成交非常活躍，股價一度抽高到最多升近14%，高見6.81元。
內地目標係2026年前，全國煤礦智能化產能佔比唔可以低於60%，由於煤礦、非煤礦場工作危險又繁重，未來最少30%及20%要用智慧裝備或機器人替代，三一產品包括礦場機器人、礦用無人駕駛車輛、無人化智慧鑽爆裝備研發等，未來內地對礦山裝備嘅替換需求唔少，會對有60%收入來自礦山裝備嘅三一有支持。
三一股價1個月內已累升70%，今日已升穿100天線，雖然同250天線仍有一段距離，但14天相對強弱指數(RSI)已升至72嘅超買水平，有一定回調壓力。
