【Now財經台】文化體育及旅遊局估計，「五一黃金周」假期內地訪港旅客達80萬人次，預期可帶動消費20億元。財政司司長陳茂波早前亦指出，旅遊業復甦短期有助拉動本港經濟表現。
不過，資深經濟師羅家聰認為，旅遊消費佔本港本地生產總值(GDP)唔夠5%，對經濟支持作用有限。佢引用政府數據指，去年內地過夜及唔過夜旅客消費開支，分別達804.7億及198.82億元，平均每日只得幾億元，以日均約10萬過境人次計，其實人均消費唔高。
KC續指，疫後內地遊客傾向唔會留港過夜消費，加上內地近年收緊外匯監管政策，令內地富豪難再借旅遊名義來港走資，訪港旅客跟本港零售數字已經冇乜關連性。
對於有大行睇好本港今年GDP可以靠外需帶動，KC就認為冇咁樂觀，又指高息口加上地緣政治風險削弱外資在港投資嘅吸引力，而本港出口增長主要靠商貿服務業，但商務旅遊仍未復甦，側面反映在港商業活動減少，對經濟幫助不大。
