【Now財經台】美國聯儲局減息時間仍未有頭緒,市場繼續得個估字,最大問題仍然係數據,之前美國通脹數據出爐後,令市場擔心美國會出現滯脹,估聯儲局會推遲減息時間,但最新公布嘅非農數據及失業率,又令市場覺得唔使對減息太悲觀。本港方面,銀行同業拆息(HIBOR)隨美國減息預期波動,而拆息扯高一般不利港股,會唔會打擊近期回勇嘅港股?美國到底幾時先會減息?
安泓投資總監兼香港大學房地產及建設系客席副教授楊書健指,雖然港元拆息4月先跌後升,但仍未上返2月及3月嘅平均數,而拆息升對流動性影響唔大,所以唔使擔心會窒礙港股升勢。
Victor又話,睇返美企上季業績,人工智能(AI)相關企業表現唔錯,而美民生相關股份開始轉弱,反映當地中產去到盡頭,所以唔需要太擔心會唔會加息,又或者減息減得少。