【now.com財經】上星期五(5月3日)出咗隻恒指熊(52037)，平均買入價為0.072元，Set好五分鐘圖中軸做上方量度線。
落場後指數跌幅都有見少過升200點，不過同時由於指數行得太慢，所以保歷加通道口收窄，夾夾下，喺下半場1點10分時已經見指數被夾返上中軸樓上，的確係觸發咗(52037)走貨訊號，但另一個矛盾位係同步保歷加通道口收窄，頂線向下限制指數再向上嘅空間。咁樣嘅情況下倒底隻(52037)走定唔走好呢？
傻嘅，從來落場第一戒條就係嚴守策略，以1點10分起計如常用10分鐘走貨的話，期內(52037)0.071元/0.068元，平均走貨價為0.0695元，呢一趟平均輸2.5格或3.47%；睇嚟好唔想跌咁喎。
啱啱過去嘅星期六全日宅在家，事關出面天氣唔止落雨咁簡單，初初天文台話會出黑雨，個天黑足一日都未見過個黑雨。「你都係返星期一至五啫，星期六關你鬼事咩！」咁仲有其他人星期六都係要返工架嘛；尤其是將軍澳區，嗰日窗都慳返唔駛洗。
今日總算見返個太陽，而恒指九連升，技術上「神奇九轉」已經出現；再加上上星期五裂口確認。「裂口理論」都可以搬埋出嚟，確實有種高處不勝寒嘅味道。
恒指完U後只係微升12點，望望我家肥貓係邊，原來走咗入房攤喺床度睇電視，哼，唔怪之得成日聽啲人講做貓好過做人。
及至依家9點47分，指數先跌後升再倒跌，Chok到隔夜飯都嘔埋出嚟，今朝作戰室喺開市前都未定到個策略，決定等市有方向之後先至出手。
老實講，以指數依家嘅點數計，靠近熊證街貨兼向上再殺係好合理；但同時間技術轉勢嘅歡呼聲愈來愈高，高到今日見牛熊街貨圖，熊證街貨都無上個星期咁多，似乎大家都收返Cash。
10點打後先見小時圖仍然企於10線之上，但一放線就見指數其實同橫行都無乜分別；五分鐘圖上見指數依家夾咗個「長方形」出嚟上上落落中，未有方向之下都係做觀眾算啦。
作者阿珊，以技術分析專心玩輪證，唔貪心，努力賺取我家肥貓罐罐。
Patreon新增內容《開市前速報》，七日免費試用：https://www.patreon.com/join/cbbcwar
