【now.com財經】周中放一日假都咪話唔爽,記得之前唔知邊個定喺邊度睇話鼓勵一個星期返五日工變四日工,哼,係就好囉;不過當年由一個星返六日變五日都搞咗好耐,老娘我都曾輕返過一週六日,每日踩14個鐘嘅地獄工,「乜嘢工咁痴線呀?」做報紙囉,$5一份嘅年代;不過依家呢一行都唔容易,或者係從來都無容易過。
如同恒指上20,000點一樣,連18,000點都未企好,或者過呢啲心理關口位點都係要多少少時間同勇氣嘅。截至依家9點52分為止,恒指仍然保持到連升格鳥局,算是踩住250線抖緊。
仲有3分鐘先至到10點,作戰室今朝開市後見五分鐘圖出「大陽燭」追上後先至出好倉,借一借星期二嘅高位17,902點做上方量度線,一搪17,903點之後觸發好倉爬格仔注收網,跟手重新再等另一個新嘅機會再入,暫時睇都似係向上再打,不過要真真正正食到街貨嘅話,都真係要指數踩返入18,000點以上。
小時圖見指數於10點前已經重新踩好10/20線,10點後指數無啦啦一棍出現用向上抽高,將指數打返向保持加頂線水平,好倉喺作戰室已經見有戰友再追,而如果睇呢個專欄嘅你,好倉一齊追出可以嘅,反正大家都係借緊10/20線而出好倉,但有一樣嘢大家都要一齊留意嘅係,目前小時圖保歷加通道口仍然收窄中,假如指數係借頂線同中軸行Swing的話,咁頂線位一到指數又會回;除非保歷加通道口變返平衡。
恒指牛(56490),收回價17,500點,今日新上牛所以未見有街貨,槓桿有約42.53倍,同一收回價中最高槓桿兼最活躍成交。
記得記得保歷加口要拓返變平衡,指數踩好10/20線,咁隻(56490)先至有得hold。
作者阿珊,以技術分析專心玩輪證,唔貪心,努力賺取我家肥貓罐罐。
Patreon新增內容《開市前速報》,七日免費試用:https://www.patreon.com/join/cbbcwar